.svg){kind=logo}
Torsdag kom nye Knester heim til Austevoll og Salthella. Mandag blir det testing av notkast, før den går på makrellfiske.
- Vi er nokre månader forseinka, men det meste har likevel gått etter planen. No gler vi oss til å kome i gang med makrellfisket, seier Kai Eliassen, dagleg leiar i Knester AS.
Fartøyet med total lengde på 75,20 meter er bygd ved Karstensens Skibsværft i Danmark og blei overlevert reiarlaget tidlegare denne månaden. Skroget er bygd ved Karstensens Shipyard Poland i Gdansk. Fartøyet er designa for kombinert trål- og notfiske, med kolmule som hovudart i trålfisket vest av Irland, og sild og makrell som hovudartar i notfisket.
- Vi har gjennomført prøvetråling og på mandag skal vi prøve oss på notkast. Då får vi med nokre teknikkarar om bord. Deretter håpar vi å kome raskt i gang med fisket, seier Eliassen.
Knester AS har no to fartøy: Steinevik og nye Knester. Reiarlaget blei etablert i 1967 av Knut Stenevik, og blir i dag drive familiane Stenevik og Eliassen.
Reiarlaget har lagt stor vekt på innovative løysingar på det nye fartøyet, som skal sikre gode og trygge arbeidsforhold og komfort for mannskapet.
