Snøkrabbekvoten aukar i 2027

Nærings- og fiskeridepartementet har fastsett totalkvoten for snøkrabbe i 2027 til 16 594 tonn, som er ein auke på 4528 tonn frå 2026.

Dette er i tråd med tilrådinga frå Havforskingsinstituttet. Totalkvoten er meir enn dobla dei siste fem åra.

- Auken i snøkrabbekvoten er gledeleg, særleg når det ikkje står like bra til med andre viktige bestandar, seier fiskeri- og havminister Marianne Sivertsen Næss.

Minstemålet på 95 mm skalbreidde blir vidareført i 2027. Det bidreg til å sikre fangst av høg verdi og verne om bestandens potensial for reproduksjon.

Fiskeridirektoratet har publisert forslag til regulering for 2027. Forskrifta vil bli fastsett av departementet når høyringsprosessen er gjennomført og departementet har konkludert i saka.