Fullteikna Fiskebåt-årsmøte

Det er venta rundt 400 personar til Fiskebåt sitt årsmøte i Oslo 10. og 11. februar. På agendaen er både fiskeriministeren og geopolitikk.

Etter styreleiar Christian Halstensen sin opningstale, vil fiskeri- og havminister Marianne Sivertsen Næss (Ap) orientere om regjeringa sin nærings- og fiskeripolitikk.

- Vi set stor pris på at fiskeriministeren kjem på vårt årsmøte, og treffer våre medlemmar. Vi er også glade for den store interessa for fiskerinæringa, og at Hotel Bristol også i år fyllast opp med 400 deltakarar frå alle delar av fiskerinæringa, seier Audun Maråk, adm.dir. i Fiskebåt.

Fiskeripolitikken er global, og det er difor naturleg at den urolege situasjonen i verda også blir tema på årsmøtet. Til møtet kjem difor tre foredragshaldarar knytt til den geopolitiske situasjonen. Temaet blir det internasjonale bildet med stormaktsrivalisering, og det krevande farvatnet som norsk fiskerinæring må navigere i. Det blir innlegg frå statssekretær, Eivind Vad Petersson i Utanriksdepartementet, professor Øystein Tunsjø frå Forsvarets Høgskule og politisk redaktør Kjetil Alstadheim i Aftenposten.

Fiskeria har også utfordringar med låge kvotar for fleire fiskeslag. Forskingssjef Geir Huse ved Havforskingsinstituttet kjem til årsmøtet for å oppdatere forsamlinga om korleis situasjonen i havet er.
 
Programmet startar kl. 09.00 tysdag 10. februar. Detaljert program vil bli lagt ut når dei siste detaljane er på plass.

På årsmøtet sin andre dag blir det ordinære årsmøtesaker, og ei orientering om vegen vidare etter at Fiskebåt melde seg ut av Norges Fiskarlag på landsmøtet i november 2025.

Årsmøtet blir som vanleg i konferansesalen i Hotel Bristol i Oslo. Møtet blir streama for dei som ikkje har høve til å delta fysisk.

‍