.svg){kind=logo}
- Vi opplevde ein bråstopp frå kundar, då regjeringa endra reglane for CO2-avgifta 1. juli. No er vi glade for at regjeringa snudde og utsette endringane til å gjelde frå 1. januar neste år. Det sa Maren Kleven Fox i Bunker Oil, då ho snakka på Fiskebåt Vest sin fiskerikonferanse i Ålesund i dag.
Trass ei viss glede over at endringane i avgiftsregimet er utsett, så er det langt frå ein normal situasjon fortalte Fox.
- Ei avgift som fører til auka klimagassutslepp og set arbeidsplassar langs heile kysten i fare, er ingen god sak for politikarar i ein valkamp, sa Kleven.
Droppar å bunkre i Norge
No håpar ho at politikarane kan sette seg saman etter valet og legge stabile føringar for kva CO2-politikk som skal gjelde. Etter det som skjedde i sommar har selskapet mista dei fleste av dei utanlandske kundane sine.
- Vi opplever at fleire av våre utanlandske kundar styrar unna Norge, og heller bunkrar i andre land, sa Kleven.
Til saman er det snakk om avgifter på 3,5 milliardar kroner, noko som er langt over det flåten kan tåle, sa Audun Maråk i Fiskebåt, i sitt innlegg på konferansen.
Flåten ønskar å bidra
- Dette er ein stor kostnad for mange reiarlag, og dette skal kome samtidig med at vi skal omstille flåten til å bli meir klimavenleg, sa Maråk.
Han viste til at flåten ønskar å bidra til å bli meir grøn, men at det i dag ikkje er nokon reelle alternativ til fossilt drivstoff.
- Å tvinge den norske fiskeflåten til å bunkre i utlandet er ingen god løysing. Det vil auke dei globale utsleppa og i tillegg svekke beredskapen langs kysten, sa Maråk.
