.svg){kind=logo}
Det er no fleirtal på Stortinget for å fjerne CO2-avgifta for fiskeflåten, etter at også Senterpartiet går inn for det. Tidlegare har Høgre, Framstegspartiet og Kristeleg folkeparti gått inn for det same.
Stortingsrepresentant Geir Inge Lien i Senterpartiet fekk med seg landsmøtet på å fjerne CO2-avgifta for fiskeflåten, melder TV2.
CO2-avgifta er ei særavgift som blei innført for å redusere utslepp av klimagassar, og stimulere til meir klimavennlege drivstoff. Så langt er det ikkje så mange alternativ til diesel for store delar av den norske fiskeflåten.
- Misforstått miljøpolitikk
– Dette er misforstått miljøpolitikk som totalt sett aukar klimagassutsleppa, seier Geir Inge Lien (Sp) til TV2.
No går også Senterpartiet inn for å fjerne avgifta. Tidlegare har Høgre, Frp og KrF også gått inn for fjerne avgifta Dermed er det fleirtal på Stortinget for å fjerne avgifta, slik samansettinga er i dag. Det er derimot ingen ting som tyder på at nokon av opposisjonspartia vil ta opp dette før Stortinget tar sommarferie, og det vil såleis bli ei sak i budsjettforhandlingane etter stortingsvalet til hausten.
Har lenge peika på utfordringane
Fiskebåt har lenge påpeika utfordringane med dagens avgiftsregime, og vist til at slik det fungerer i dag, så har den ingen klimaeffekt - heller tvert om.
– For ein trålar som er på ein fem vekers tur, så finnast det ikkje alternativt til fossilt drivstoff utanom biodrivstoff, seier fagdirektør Jan Ivar Maråk i Fiskebåt til TV 2.
Kort fortalt unngår fiskeflåten avgifta ved å oppsøke hamn i utlandet før dei startar fiske. Dermed blir heile turen definert som utanriksfart, noko som gir fritak frå avgifta, men som samtidig aukar utsleppa.
Utanriksfart
– For å sleppe CO2-avgift tar fiskebåtane først turen til Shetland, ellar ei anna utanlandsk hamn, før den startar å fiske. På den måten blir heile turen lovleg og definert som utanriksfart, og dermed fritatt frå den særnorske avgifta. Resultatet er at båtane brukar meir drivstoff og dermed aukar utsleppa. Dette er galskap, og ei avgift heilt utan miljøgevinst, seier Maråk.
Statssekretær Ellen Reitan i Finansdepartementet skriv i ein epost til TV 2 at regjeringa er opptatt av at klimapolitikken ikkje skal ha uheldige konsekvensar, og at det blir jobba med kartlegge effektane av klimapolitikken.
Her kan du lese heile saka frå TV2.
